Årets Alumn ved Handelshøgskolen ved UiS er Eimund Nygaard

«Årets alumn» er ei utmerking til ein tidlegare student som er ein motivator for nåverande og tidlegare studentar. Gjennom hardt arbeid har kandidaten utmerka seg i positiv forstand, både gjennom solid karriereutvikling og bidrag til samfunns- og næringsliv.

Tittelen «Årets Alumn» 2022 frå Handelshøgskolen ved UiS går til Eimund Nygaard. Nygaard er administrerande direktør i Lyse AS og konsernsjef for Lyse-konsernet. Nygaard er blant anna utdanna i økonomisk-administrative fag ved Rogaland Distrikthøyskole. Han fullførte sin grad som høgskulekandidat i økonomisk-administrative fag i 1985.

Hatt tett kontakt med UiS

– Det er hyggeleg å bli kåra til årets alumn. Det er veldig lenge sidan eg vart uteksaminert, men det er flott at eg ikkje er gløymt, seier Nygaard.

Han har hatt tett kontakt med UiS i heile hans yrkesaktive tid.

– Det skyldast både at eg synest det er nyttig og hyggeleg, men meir fordi dette er ein viktig institusjon for heile regionen. Eg var konsernsjef i Lyse også då det blei gitt 100 millionar kroner frå kommunane gjennom Lyse for å få universitetsstatus. Eg har også vore del av styret til UiS, samt at Lyse har ein omfattande samarbeidsavtale med universitetet. Denne tette kontakten vil eg framleis ha så lenge eg er yrkesaktiv (og sikkert etter det også).

Ein verdig kandidat

Det er ein jury beståande av professor Aslaug Mikkelsen, professor Ragnar Tveterås og seniorrådgjevar Lene Hoff ved Handelshøgskolen ved UiS som kom fram til at Eimund Nygaard skulle blir kåra til Årets Alumn 2022.

I teksten til nomineringa blei blant anna følgande fremheva:

Nygaard er ein aktiv nærings- og samfunnsdebattant og representant som svært ofte har vore i media, spesielt i det siste året, også i nasjonale media. Som representant for energisektoren i og med den pågåande energikrisa i Europa og Noreg, og krigen i Ukraina, har Nygaard hatt evna til å formidle eit viktig bodskap på ein klar og tydeleg måte. Nygaard har også velvillig stilt opp på arrangement ved UiS som for eksempel Børs og Fakultet i regi av Handelshøgskolen ved UiS og Næringsforeningen. Nygaard er ein verdig kandidat til Årets Alumn 2022.

Tips til arbeidslivet

Prisen vart delt ut av professor Aslaug Mikkelsen på førjulsfesten for tidlegare studentar frå Handelshøgskolen ved UiS 24. november. Nygaard mottok tale, blomar og ein plakett med prisen på. Under festen vart det konsert, middag og mingling blant tidlegare studentar og vitenskapelege tilsette.

Til studentar som skal ut i arbeidslivet har Nygaard eit ganske konkret tips:

– Det er viktig med ei god og relevant utdanning i botn, men deretter handlar det om tre ting: Haldningar, haldningar og haldningar.  

Om UiS Alumni

UiS Alumni er eit nettverk for tidlegare studentar ved UiS. Handelshøgskolen har ei eiga gruppe for kandidatar med grad innanfor økonomisk-administrative fag og rettsvitskap ved UiS.

«Alumn» er latinsk og blir oversett til «tidlegare student». Formålet med alumninettverket vårt er å vere ein møteplass for tidlegare studentar, fagmiljø, og tilsette knytta til Handelshøgskolen UiS.

Hederstittelen er blitt delt ut tre gongar sidan 50 års jubileet for økonomisk administrativ utdanning i Stavanger i 1999.

Tidlegare vinnarar er:

• Therese Log Bergjord i 2021

• Ruth Vihovde Strand i 2020

• Sunniva Landmark Bjørnstad i 1999

Ønsker du å bli Alumni-medlem? Trykk her for å melde deg inn.