Vil ha redusert skatt på arbeid, men auka skatt på konsum

Måndag 19. desember la Skatteutvalet fram si utgreiing NOU 2022: «Et helhetlig skattesystem».

To av medlemene i utvalet har vore professor i skatterett Benn Folkvord og økonomiprofessor og dekan Ola Kvaløy – begge frå Handelshøgskolen ved UiS. Utvalet har blitt leia av professor Ragnar Torvik frå NTNU.

Pressemelding frå Finansdepartementet: Skatteutvalet har lagt frem sin utredning

Utvalet har foreslått nokre hovudgrep:

• Redusert skatt på arbeid, auka skatt på konsum
• Høgare skatt på klimagassutslepp og helse- og miljøskadelege aktivitetar
• Fleire grunnrenteskattar
• Redusert formueskatt, og innføring av skatt på arv
• Ny bustadskatt
• Enklare moms med ein sats, der auka skatteinntektar blir sett av til kompenserande omfordelingstiltak

– Forslaget er såkalt provenynøytralt på kort sikt, men vil på lengre sikt kunne gje meir verdiskaping og høgare skatteinntektar. Viss politikarane lyttar til våre forslag, vil skattesystemet gje ennå betre samfunnsøkonomi og betre fordeling enn det me har i dag, seier Kvaløy.

Nå skal utgreiinga ut på høyring.

– Det kan sikkert gje mange gode innspel, samtidig kan me ikkje rekne med at dei ulike høyringsinstansene har same blikk på heilheiten i systemet, slik utvalet har hatt. Me får derfor håpe at særinteressene ikkje får for stort gjennomslag når politikarane til slutt skal vedta endringar i skattesystemet, seier Kvaløy.

Intenst og lærerikt

Det var regjeringa Solberg som i juni 2021 sett ned eit ekspertutval som skulle gjere ein heilheitleg gjennomgang av skattesystemet. Dei skulle vurdere korleis skattesystemet burde utformast for å sikre ein sterk og konkurransedyktig økonomi i møte med sentrale utviklingstrekk som globalisering, digitalisering, teknologiutvikling, grøn omstilling og ei aldrande befolkning.

– Det er veldig bra at ein nå skal sjå på utforminga av skattesystemet, og det er ei fin anerkjenning å få delta i utvalet, sa Folkvord då utvalet vart kjent 18. juni 2021. Han meinte dagens skattesystem er ekstremt komplisert og langt på veg uforståeleg.

Også Kvaløy meinte at utvalets arbeid ville bli svært viktig, og at det ville ha betyding for universitetet.

– At Handelshøgskolen ved UiS stiller med to medlemer i utvalet er ei fin anerkjenning til vårt sterke fagmiljø innan samfunnsøkonomi og rettsvitskap.

Når utgreiinga nå endeleg er lagt fram seier Kvaløy at det heile har vore svært interessant og lærerikt å vere ein del av.

– Me har jobba ganske intenst, særleg det siste halvåret, med møte nesten annakvar veke, seier Kvaløy.